તરસને તોડું છું

પ્રભાતે ઝાકળબિંદુ લાવી તરસને તોડું છું,

ટાઢી એક ક્ષણને તપાવી વરસને તોડું છું,

આ કંચનવર્ણી છબી તારી,સ્પર્શે કોતરી હતી,

કથીરના ટુકડા સંઘરી, આ પારસને તોડું છું;

તારી દરેક બોળચોથના ઉપવાસ ભુલ્યા મેં,

એકલા હું પારણા કરી અગિયારસ તોડું છું;

પહેલી મુલાકાત આપણી કેમે ભુલાય નહી,

એટલે આખરી યાદના આ વારસને તોડું છું;

ઝૂંપડીમાં વાંસડે તારી યાદનું ફાનસ સળગે,

વિસ્મૃતિના પાણીએ મહેલનો આરસ તોડું છું;

આપણે બંધાયા હતા સાતભવના કોલ કરી,

મોતને એકલું બોલાવી અરસપરસને તોડું છું;